PAALALA SA MGA DRUG USER

Oct 1, 2016

Heto ang aking personal na paalala sa mga drug user o addict.

WALANG MABUTING IDUDULOT ang paggamit ng illegal na droga sa inyo. HINDI LALAKAS ang katawan ninyo. Sa halip, papayat at tuluy-tuloy kayong manghihina habang patuloy kayong nagda-drugs, hanggang sa kinalaunan ay MAMATAY KAYO ng maaga. Isipin ninyo: May kilala o may nakita na ba kayong addict na lalong gumwapo o gumanda, naging macho o sexy, dahil sa illegal na droga?

HINDI KAYO KIKITA O YAYAMAN. MAUUBOS ang pera ninyo, pati na ang sa mga magulang ninyo, kakabili ng drugs kung saan addict na kayo. At kapag wala na kayong pambili at ayaw na kayong bigyan ng mga magulang ninyo ng sobra-sobrang pera, matututo na kayong magnakaw o mangloko ng tao magkapera at makabili lamang. Payayamanin na ninyo ang pusher o drug lord, KULUNGAN PA ANG KABABAGSAKAN NINYO pag gumawa kayo ng masama at nahuli. HUWAG NINYONG ASAHAN na tutulungan kayo ng pusher o supplier ninyo ng droga na makalaya.

Pangalan at reputasyon ninyo, at ng inyong mga magulang o pamilya ang masisira kapag naging addict kayo. HINDI ANG SA PUSHER.

Imbes na mas tumalino ay MABOBOBO kayo kapag magiging addict kayo. Magiging malilimutin, at katagalan ay MABABALIW kayo. Kung may kokontra, magharap din agad ng kahit isang taong masa naging matalinoi dahil sa paggamit ng illegal drugs. HINDI RIN KAYO SISIKAT bilang addict. KAIINIISAN at iiwasan kayo ng mga nakakakilala sa inyo. Lalong hindi kayo magkakaroon ng anumang premyo o award mula kaninuman sa paggamit o pagabuso ng droga.

Panghuli, HINDI SOLUSYON ang illegal na droga sa anumang problema ninyo. Kung iniwan kayo ng asawa ninyo o boyfriend/girlfriend, lalo kayong HINDI BABALIKAN pag nalamang nagda-drugs na kayo. Gayundin kung hindi kayo pinapansin ng iniiibig ninyo ng lihim. Kung ang katwiran namam ninyo ay hindi kayo mahal ng mga magulang ninyo, LALO KAYONG MAGKAKALAYO. Unang-una na, IPAPAREHABILITATE nila kayo. Isipin ninyo, may nabalitaan na ba kayong pamilyang MAS NAGKALAPIT-LAPIT sa isa’t-isa dahil sa pagiging addict ng isang miyembro? KARAGDAGANG PROBLEMA, hindi solusyon, ang ibibigay ninyo sa inyong sarfili at sa inyong mga mahal sa buhay.

ILIGTAS NINYO ANG INYONG MGA SARILI, HABANG MAAGA!30