OVERACTING NA ANG KAMPO NI DUTERTE!

Ngayon pa lamang ay OVERACTING na ang kampo ni presidential aspirant at Davao City Mayor Rodrigo Duterte. Ayon kay dating North Cotabato Gov. at media man Emmanuel Piñol, may natanggap silang ulat na may nagsama-sama na raw na malalaking drug lords mula sa Luzon,Visayas at Mindanao upang matiyak na hindi magiging Pangulo  si Duterte. Kabilang daw sa mga plano  ng mga drug lord ay ang pagpatay kay Duterte, ang malawakag paninira sa pamamagitan ng black propaganda at ang paglustay ng salapI sa eleksyon upang hindi  ito manalo, Bakit OVERACTING?

Una: HINDI PA NAGDEDEKLARA si Duterte na tatakbo siyang pangulo sa halalan sa sang taon. Kaya’t WALANG MATINONG DAHILAN para pagplanuhan na siya agad ng mga drug lord o ng sinuman. Pangalawa: HINDI PA NANGUNGUNA si Duterte sa  anumang survey ng mga maaaring tumakbong Pangulo. . At walang anumang indikasyon na malalampasan na niya ang mga nangunguna na sina Bise-Presidente Jejomar Binay at Sen.Grace Poe. Kaya’t alam ng mga drug lord na SAYANG ANG ORAS AT PERA kung pagpaplanuhan na agad nila si Duterte. Kung mayroon man silang poproblemahin at pagpaplanuhan ngayon pa lamang, iyun ay sina Binay at Poe. 

Pangatlo, BILYUN-BILYON ang kinikita ng bawat drug lord taon-taon. Mga ahensya na ng pamahalaan mismo ang nagsasabi nito. Kaya’t hindi kailangang pati mga drug lord sa Luzon at Visayas ay makisama sa mga taga-Mindanao para lamang ipapatay o sirain ang reputasyon ng isang kandidato lamang. Ayon sa ilang alagad ng batas na nakausap ko, kabilang ang mga drug lord sa mga SAKSAKAN NG GULANG O KURIPOT pagdating sa pera. Kung makakaiwas sila sa gastos, kahit maliit lamang, ay iiwasan  nila.

Walang dudang  sikat at may mga tagahanga na s Duterte, hindi lang sa Davao City kundi sa iba pang bahagi ng bansa. Subalit kung ngayon pa lamang ay ganito na KABABAW ang pagiging GIMIKERO ng kaniyang kampo,  MABABAWASAN, KUNDI MAN MAWAWALAN siya ng kredibilidad sa nakararaming mga botante. 30